%20(1).jpeg)
رواية انا وابن خالتي الفصل الثاني 2 الجزء الخامس بقلم عمرو راشد
في ايه يا هند مالك؟
= في حد كان واقف عند الباب وباصص ناحيتي
حد مين يا حبيبتي مفيش حد في الأوضة
= يا مروان انا متأكدة
" بص ليا لثواني و بعدها قام و شغل النور وابتسم وقالي
مفيش حاجة اهو
" وفعلا مكنش في حاجة و بعدها هو طفى النور تاني وقالي
تحبي اشغله تاني عشان تتأكدي
" والمرادي لما النور اشتغل شوفت كائنات طويلة جدا،، عندهم اكتر من دراع،، وشهم محروق كانو محاوطين الأوضة كلها،، واحد منهم شاور ب ايده على مروان وفي ثانية مروان وقع على الأرض و وزحف ل ورا ناحيتي بسرعة،، ساعتها قعدت أصرخ وأقول بصوت عالي
اعوذ بالله من الشيطان الرجيم،، أعوذ بالله من الشيطان الرجيم،، اعوذ بالله من الشيطان الرجيم
" فجأه لقيتهم اختفو من الأوضة،، قومنا بسرعة انا مروان وخرجنا من الأوضة اللي بمجرد ما خرجنا منها الباب اتقفل ورانا بقوة شديدة جدا،، خرجنا وقفنا في الصالة و ساعتها لقينا عبدالله هو كمان خارج من اوضته بيجري علينا وسماه باين عليه الرعب وقال
رجعو يا هند،، رجعو
" مروان رد عليه وقاله
احنا لازم نسيب البيت حالا
" جرينا خطوتين ل قدام ولكن وقفنا تاني لما لقينا باب الشقة اختفى،، متستغربش،، باب الشقة فعلا اختفى وبقا مكانه حيطة وحتى الشبابيك كلها اختفت،، الشقة كلها عبارة عن حيطان مفيش أي منفذ للخروج منها،، مروان اتقدم خطوتين ساعتها وقال
الرحلة ابتدت
" النور فجأه قطع في الشقة و بدأنا نسمع أصوات مرعبة من كل مكان،، اصوات ناس كأنها بتتعذب،، اصوات خارجة من الجحيم حرفيا،، بدأنا نزعق احنا التلاتة بأعلى صوتنا ونقول
يارب.. يارب..يارب..يارب
" مكنش في على لساننا غير الكلمة دي لحد ما كل حاجة بدأت تهدى والنور رجع،، كل حاجة كانت رجعت بشكل طبيعي جدا والباب ظهر من تاني،، عبدالله ساعتها جري وقال
انا هدخل البس وأنزل،، انت مش هقعد في البيت دا دقيقة واحدة تاني
" مروان رد عليه
وهما كدا هيسيبوك يعني؟،، دا تحذير واضح منهم انهم رجعو ومش هيسيبو حد فينا حتى لو خرجنا من البيت
" رديت بسرعة عليهم
اتصل ب هارون يا مروان،، أي حد فيكم يتصل بيه
" مروان رد عليا
وهو هارون هيعملك ايه؟،، انتي ناسية انه بقا بني آدم خلاص
= اكيد هيعرف يتصرف
هيتصرف ازاي يعني؟،، ايه الحل اللي هيكون عنده؟
= معرفش يا مروان في ايه انا بقترح حل
الحل اننا نشوف شيخ بجد وهو اللي يحصن البيت من اي حاجة
" عبدالله رد ساعتها وقال
مروان انت لازم تعرف اننا مش بنحار*ب جن واحد دول كتير أوي،، انهي شيخ هيقدر عليهم؟
= القرآن هو اقوى حل وممكن يحمينا من اي حاجة خلقها ربنا
انا متفق معاك جدا على فكرة بس هو انت فاكر انهم هيسيبوك تروح للحل دا؟
= اومال هنعمل ايه؟
مفيش قدامنا غيرهم يا مروان
= حتى انت يا عبدالله،، يا جماعة انا مش قادر افهم انتو بتفكرو ازاي،، دول بني آدمين،، بني آدمين عادي مش هيقدرو يواجهو
كلنا هنواجه مش هما بس
" في اللحظة دي سمعت تليفوني بيرن من الأوضة،، بصيت ل مروان اللي اتحرك بحذر و راح فتح باب الأوضة وبص فيها الاول قبل ما يدخل وبعدها دخل وجاب التليفون وخرج،، شاهر هو اللي بيتصل
الرسالة وصلت عندكم ولا لسة؟
= وصلت،، هي وصلت عندك انت كمان؟
وشهيرة قامت بالواجب
= طب احنا هنعمل ايه دلوقتي
انا مستنيكم دلوقتي
= وهارون؟
كلمته و زمانه جاي في الطريق
" قفلت معاه وبصيت ليهم
هنروح عند شاهر
" مروان رد عليا
ليه؟
= بيقول عايزنا
عايزنا في ايه دلوقتي؟
= اكيد عشان الموضوع دا
طب خلينا الصبح احسن
= مروان انا كدا كدا مش هعرف انام تاني بعد اللي حصل دا،، الاحسن اننا ننزل نروح
" عبدالله اتكلم وقال
انا هدخل اغير هدومي
" انا ومروان كمان دخلنا ولبسنا و بعد ما خلصنا نزلنا كلنا و روحنا عند شاهر،، دخلنا عنده ولقينا هارون قاعد هناك،، قعدنا من غير ما نتكلم ولا كلمة لحد ما شاهر بدأ هو بالكلام وقال
القهوة يا شهيرة
" عبدالله ساعتها بص له وقاله
عليا الطلاق بالتلاتة يا سيد لو شوفت اي قهوة قدامي هرمي نفسي من اقرب شباك وانت حر
= خلي بالك انت كدا بتجرحني؟
وانت مبتجرحنيش لما تخليني اشرب القهوة دي
= بجد انت ازاي كدا؟
انت اللي ازاي كدا؟
= انت ازاي قاسي كدا؟
وانت ازاي حلو كدا؟
= انت ازاي انت كدا؟
كدا ازاي انا قصدي خير يا شاهر عادي
= انا راجل متجوز دلوقتي و مش عايز قلق،، الست اللي جوا دي لو سمعت كلامك دا هتفضحني وسط العفاريت كلهم
= خلاص اعتبرني مقولتش حاجة
قولي تشرب ايه بقا؟
= اشرب...
جرح،، ظلم.. وجع.. كل اللي انت عايزه أوامر
" هارون اتكلم في اللحظة دي وقال
اقوم امشي طب؟
" شاهر رد عليه
لا خليك لسة السهرة هتبدأ
= والله اقوم امشي ولما تخلصو كلامكم كلموني ساعتها
يا هارون القعدة الحلوة مبتتعوضش وانت عارف
= لا انا مش عارف،، كل اللي انا عارفه اننا في مصيبة و دا اقل ما يقال عنها
مصيبة ليه يا عم ما الجو زي الفل اهو
" عبدالله رد عليه وقاله
الأول كانو بيخافو منكم وبيعملو الف حساب لكن دلوقتي صعب خصوصا بعد ما بقيتو بني آدمين
= بالظبط،، الموضوع هيبقا صعب المرادي أوي
" مروان دخل في الحوار وقال
طب يا جماعة ما احنا نقدر نقف قدامهم بالمفاتيح اللي معانا
= وهنحميها ازاي؟ المفاتيح دي اخر فرصة معانا ممكن نلجأ ليها،، لكن حاليا محتاجين نفكر في حل
" عبدالله رد وقال
طب يا جماعة ماهو شهيرة معانا ممكن تحمينا
" شاهر رد عليه
عايز تخلي النسوا*ن تدخل يا عبدالله
= بابا انا مقصدش،، انا بقترح حل بس
انا مصدوم فيك،، ابني انا يقول كدا؟
= بابا انا..
أخرس انا مش ابوك،، انا مبقاش ليا ولاد واللي هيسألني عنك هقول ما*ت واتدفن
يا بابا احب على رجلك
= اوعى،، ومفتكرتش رجلي غير دلوقتي يا ابن السباعي،، ههه حقك
مكنتش شايفها يا بابا حقك عليا
= رجلي كانت باينة قدامك طول الوقت بس انت اللي كنت مصمم تبقى اعمى
انت اللي بتلبس جلاليب طويلة يا بابا
= هههه وهو دا عذر؟،، كان ممكن عادي ترفع الجلابية وتشوف
يا بابا عيب كدا
= يا وجع القلب عليك يا عبدالله يا ولدي
" مروان زعق وقال
ايه يا جماعة دا؟،، ايه اللي بتتكلمو فيه دا؟،، انتو معانا ولا انتو عايشين على كوكب لوحدكم ولا ايه؟
" شهيرة خرجت من جوا وهي بتتكلم وصوتها عالي وبتقول
مين اللي بيزعق في بيتي الساعة 4 و 45 دقيقة؟
" شاهر شاور على مروان وقال
سيادة الباشا
" شهيرة جات وقعدت معانا وقالت ل مروان
انت متعرفش ان الصوت عالي ممنوع في البيت هنا؟
= ليه يعني؟
صوتك العالي يا استاذ دليل على ضعف موقفك
" شاهر رد عليها
جدعة يا شوشو ابعتيهاله
" شهيرة رجعت تكمل كلامها
صوتك العالي يا مروان دليل على ضعف موقفك
" شاهر غمز ليها و قالها
امممم يا شوشو ابعتيهاله تاني
= بس انا كدا رصيدي هيخلص
هشحنلك
" ردت عليه بدلع وهي حاطة رجل على رجل
بكام بقا؟
= هشحن ب 10
قليل
= 15
قليل يا شاهر
= طب 20 يا قلب شاهر
افكر؟
" قرب منها شوية وقال
طب 22
= هفكر
طب 24
= ومالو
دا احنا هنخربها يوتيوب للصبح
" هارون قام وقف وقال بصوت عالي
انا ماشي
" شاهر قام وقف معاه ومسك ايده
خلاص يا هارون اقعد انا هشحن ب 100 يا سيدي متزعلش نفسك،، اعصابك يااخي مش كدا
= انت مصنوع من ايه؟
لا انا عادي،، كائن يعيش ويتعايش
= ايوا يعني منين؟،، انت ايه؟ايه
بني آدم يااخي في ايه؟،، انت مش مؤمن ولا ايه؟
= ونعم بالله،، متقوليش الكلام دا بدل ما اقوم اكسر البيت على دماغك
" بصيت ل شهيرة ساعتها وقولتلها
طب أنتي مش ممكن تتوسطي ليهم فوق وممكن ساعتها يبقو هما عندهم طريقة ل هارون وشاهر يرجعو بيها من الجن تاني
= صدقيني حاولت ومنفعش،، الموضوع مستحيل
يعني ايه برضو،، اكيد في حل
" مروان رد عليا وقال
الحل في المفاتيح زي ما قولت مفيش حلول تانية
" عبدالله كمل على كلام مروان وقال
او ممكن يبقا في مفتاح يرجعكم من الجن زي ما في مفتاح يخليكم بني آدمين
" هارون رد عليه
مفيش لا،، المفتاح دا اصلا كان معمول لعقاب الجن اللي بيخرج عن الاوامر يعني اكيد مفيش مفتاح لرجوعه تاني
= متأكد يعني؟
ايوا متأكد طبعا
" شهيرة ساعتها قامت من مكانها وقالت
معاد العشا بقا،، ثواني والاكل هيكون جاهز
= اممممم يا شوشو طب بسرعة بقا
" هارون خبط كف على كف وقال
والله العظيم تلاتة انا مبتلى
" فضلنا ساكتين لمدة 5 دقايق تقريبا و بعدها لقينا شهيرة واقفة قدامنا و بتقول
العشا جاهز يا جماعة؟
= امممم يا شوشو،، طب والطعمية؟
سخنة
= والبطاطس؟
مقرمشة
= والفول؟
بالطحينة
= والزيت الحار؟
بيولع
= امممم يا شوشووو
" هارون بص ل فوق وقال
انت العالم بيا يارب،، انت العالم بيا يا كريم
" بعدها لقينا جرس الباب بيرن،، كلنا اتخضينا لان الوقت متأخر جدا ومفيش حد ممكن ييجي في الوقت دا،، شهيرة قربت من الباب وفتحت عشان نتفاجئ كلنا باللي واقف برا،، لوسيندا،، دخلت وهي مبتسمة وقعدت على الكنبة واحنا كلنا كنا واقفين ومستغربين منها لحد ما هي اتكلمت
كنت حاسة اني هشوفكم تاني؟
" شاهر رد عليها
هو أنتي مش كنتي في القصر؟ يعني انتي المفروض دلوقتي ميتة
= واستدعوني من تاني
هما مين دول؟
= سانوس و داهم
" هارون قعد قدامها وقال
وهما عايزين ايه؟
= كل حاجة،، عايزين الأرض باللي فيها
يعني ايه؟
= يعني الجن هيحتل الارض وهيعيش عليها
وأنتي جاية هنا عايزة ايه بقا؟ تحذرينا؟
= لا يا هارون
" قامت وقفت وبدأت تتمشى في الشقة
انا جاية هنا عشان اقولكم إني معاكم انتو وعايزة اساعدكم
" مروان رد عليها بسرعة وقال
تساعدينا ازاي يعني؟
= داهم وسانوس في الاول والآخر جن يعني بمجرد ما ياخدو اللي هما عايزينه هينسوني ومش هيبقا ليا لازمة تاني،، ثم اني بحب البشر ومش عايزاهم ينتهو
وانتي مش خايفة يعرفو انك معانا؟
= زمانهم عرفو يا مروان
" شاهر اتكلم ساعتها وقال
أنتي عندك علم اننا بقينا بني آدمين يعني مش هنقدر نقف قصادهم
= عارفة وعشان كدا انا جيت
هتعرفي ترجعينا ل عالم الجن تاني؟
= لا بص موضوع انكم ترجعو عالمكم دا تنسوه خالص لانه مستحيل
" هارون رد عليها
اومال ايه الحل اللي عندك؟
= مدينة النحاس
" هارون وشاهر ساعتها اتصدمو من الكلمة حتى شهيرة،، لكن انا ومروان وعبدالله محدش فينا كان فاهم حاجة،، هارون بعدها ابتسم وقال
أنتي مجنونة صح؟
= مجنونة ليه؟،، هو دا الحل الوحيد اللي قدامكم
" شهيرة ردت
يا جماعة دي بتهزر،، مدينة النحاس ايه اللي عايزانا ندخلها،، هو كان مين دخلها قبلنا عشان احنا ندخلها؟
= والله يا شهيرة دا الحل اللي عندي،، فكرو وياريت بسرعة عشان داهم مش هيستنى وهيقت*لني
" بعدها لوسيندا قربت من السفرة وخدت سندوتش طعمية وبطاطس من اللي كانو موجودين ومشيت
متتأخروش عليا،، باي
" شهيرة قفلت الباب وراها،، وكلنا قعدنا واحنا برضو لسة مش فاهمين حاجة اما شاهر كان مبتسم وبيقول
اتعلم عليك يا شاهر،، اتعلم عليك دي هتبقا سواد على الكل
" هارون رد وقاله
شاهر انت سمعت هي قالت ايه؟
= ثواني بس يا هارون هلحقها وااخد منها السندوتش و ارجعلك
سندوتش ايه يا شاهر،، ركز معايا شوية،، دي بتقولك مدينة النحاس
" مروان رد عليه وقاله
هي ايه مدينة النحاس دي؟
= مدينة النحاس دي مدينة اتبنت من الجن ل سيدنا سليمان عليه السلام،، المدينة دي فيها كنوز محدش في الأرض كلها ممكن يتخيلها،، مش في الأرض بس،، الكون كله
ومحدش راح هناك قبل كدا؟
= اللي راح هناك ما*ت،، أي حد هيفكر يدخل جوا المدينة هيمو*ت
" عبدالله دخل في الحوار وقال
طب بما انك من الجن مدخلتش هناك قبل كدا؟
= مش مسموح لينا اننا نقرب من هناك اساسا
" رديت انا وقولت
طب واحنا هندخل ازاي؟
" شاهر رد عليا
هي دي مشكلتك؟،، احنا لو وصلنا هناك نحمد ربنا أصلا،، الطريق كله خطر وفي حيوانات مفترسة،، الموضوع مش سهل خالص
" شهيرة جات وقعدت وسطنا وقالت
هو مش سهل بس مش مستحيل،، البت دي بتعرف تفكر على فكرة ومن مصلحتنا انها تبقا معانا،، مفيش حاجة في الدنيا هتقدر توقف سانوس وداهم غير كنز مدينة النحاس
" هارون رد بعدها ب دقيقتين وقال
انا موافق اروح هناك
" شاهر رد عليه
انت اتجننت يا هارون؟،، يعني المكان اللي مش عارفين ندخله واحنا من الجن هنعرف ندخله واحنا بني آدمين
= عندك حل تاني؟
اكيد في
= مفيش يا شاهر وانت عارف كويس
وأنا مش هسيبك تروح هناك،، انت لو روحت هتمو*ت،، محدش راح هناك قبل كدا وعاش بعدها ثانية واحدة
" هارون قام وقف وقالنا
يا جماعة افهموني مفيش بشر دخل مدينة النحاس قبل كدا و لو احنا دخلنا و اخدنا اللي فيها هنحكم الأرض كلها
" رديت عليه ساعتها
يا هارون انت عايزنا نروح مدينة ساكن فيها الجن!
" شاهر رد عليا
ياريته ساكن بس دا بيحرسها كمان
" مروان قام وقف هو كمان وقال
انا مش موافق ومش هروح المكان دا،، انا يإما هستخدم المفاتيح او هشوف شيخ لكن مدينة النحاس بتاعتكو دي مش رايحها،، يلا بينا يا جماعة
" انا وعبدالله قومنا وقفنا ومشينا وبعد ما فتحنا باب الشقة،، هارون زعق وقالنا
دا لو لحقت تشوف شيخ يا مروان
" بصينا له ولكن محدش اتكلم مننا وخرجنا و رجعنا بيتنا،، اول ما دخلنا لقينا النور مقطوع
اي حد فيكم يشغل الكشاف
" محدش رد عليا و ساعتها انا نفخت وفتحت شنطتي وجيبت تليفوني لكن مروان كان ماسك ايدي
مروان اوعى مش عارفة افتح التليفون
" لكنه مردش وبرضو كان ماسك ايدي
يا مروان اوعى في ايه
" فتحت كشاف التليفون و وجهته جنبي ناحية مروان اللي كان باصص ليا وبيضحك بس وشه،، وشه كان محروق،، صرخت بأعلى صوتي وبعدها لقيت النور رجع ومروان بيجري عليا و بياخدني في حضنه
اهدي انا موجود،، انا هنا متخافيش
" عبدالله اتكلم وقال
يا جماعة احنا غلطنا لما رجعنا هنا تاني،، احنا مش هينفع نقعد في الشقة دي
" مروان رد عليه
هنروح فين يعني؟
= اي مكان لحد ما نشوف حل
" مروان كان بيفكر ولكن عبدالله مستناش وقرر يمشي ناحية باب الشقة واللي لقيناه مسافته بتبعد اكتر،، خرجت من حضن مروان ساعتها و أنا مصدومة من اللي شايفاه،، عبدالله كل ما يمشي الباب بيبعد اكتر
" مروان زعق فيه وقاله
اقف متتحركش،، أي خطوة تاني هتبعده أكتر
" اتكلمت ساعتها وقولتلهم
هارون كان عنده حق،، احنا مش هنلحق نعمل حاجة
" وفي ثانية كانت الأرض بتهتز من تحتنا وكأن في زلزال في البيت،، الأرض كان اهتزازها قوي جدا جدا لدرجة اننا وقعنا،، البيت كله بدأ يتكسر علينا،، عبدالله ساعتها حاول يخرج تليفونه ولكنه وقع منه،، و بعدها بدأ يزعق فينا
اتصلو ب هااارون!!
#عمرو_راشد
#انا_وابن_خالتي 5 " كنز مدينة النحاس " 2
#يتبع
